Шинээр томилогдсон болон залуу шүүгчийг хөгжүүлэх зорилготой “Менторшип-2024” хөтөлбөрийн нээлтийн танилцуулга уулзалт 2024 оны 1 дүгээр сарын 12-ны өдөр Шүүгчийн сургалтын цахим системийн вебинар уулзалтаар зохион байгуулагдлаа.

   Тус хөтөлбөрийг 2023 онд Азийн сангийн дэмжлэгтэйгээр зохион байгуулж байсан бол энэ оноос Шүүхийн, сургалт, судалгаа, мэдээллийн хүрээлэн бие даан хэрэгжүүлж байна. Хөтөлбөрийг нээж Хүрээлэнгийн захирал Д.Эрдэнэчимэг, Сургалтын төвийн дарга Г.Халиунаа нар үг хэлж, ментор болон менти шүүгчдэд амжилт хүсэв.

   Уулзалтад өмнөх хөтөлбөрт ментор шүүгчээр ажилласан Улсын Дээд шүүхийн шүүгч П.Соёл-Эрдэнэ, Нийслэлийн Эрүүгийн хэргийн давж заалдах шатны шүүхийн шүүгч Г.Ганбаатар, Баянзүрх дүүргийн Эрүүгийн хэргийн анхан шатны шүүхийн Ерөнхий шүүгч Н.Одонтуул нар “Менторшип-2024” хөтөлбөрт сонгогдсон ментор шүүгчдэд тус хөтөлбөрийн зорилго, үр нөлөөг тайлбарлан таниулах болон өмнөх хөтөлбөрөөс олж мэдсэн туршлагаа хуваалцсан бол менти шүүгчдэд Увс аймаг дахь Захиргааны хэргийн анхан шатны шүүхийн шүүгч О.Батдорж, Дорноговь аймаг дахь сум дундын иргэний хэргийн анхан шатны шүүхийн шүүгч Ц.Ариунзул нар туршлагаасаа хуваалцлаа.

   Менторшип хөтөлбөр мэргэжлийн туршлага, ур чадвартай шүүгч өөрийн мэдлэг, туршлагаа шинээр томилогдсон шүүгчтэй хуваалцан, шинэ шүүгчийн мэдлэг чадварыг бэхжүүлэх, хуульд заасан бүрэн эрхээ мэргэжлийн өндөр түвшинд хэрэгжүүлэхэд нь дэмжлэг үзүүлж, шинэ шүүгчид биечлэн суралцах боломж олгодгоороо онцлогтой юм.

   Энэ жилийн “Менторшип-2024” хөтөлбөрт 6 ментор шүүгч, 11 менти шүүгч хамрагдаж байна. Хөтөлбөр зургаан сарын хугацаанд үргэлжилнэ.

МЭДЭЭЛЛИЙН ТӨВ