Шүүхийн шийдвэрийн огноо, дугаар: Архангай аймаг дахь Захиргааны хэргийн анхан шатны шүүхийн 2024 оны 12 дугаар сарын 09-ний өдрийн 109/ШШ2024/0037

Тоймын огноо, дугаар: 2025 оны 3 дугаар сарын 17, Дугаар 4

Тоймын төрөл: Шүүхийн шийдвэрийн тойм

Шийдвэрийн төлөв: Хүчин төгөлдөр болсон

Санамж: Энэхүү тойм нь шүүхийн шийдвэрийг орлохгүй бөгөөд олон нийтийг мэдээллээр хангах зорилготой болно.

Иргэн С анх Архангай аймгийн Цэнхэр сумын Засаг дарга 2011… оны .. дүгээр сарын …-ны өдрийн …дугаар захирамжаар 50 га газрыг үр тарианы зориулалтаар эзэмшиж байжээ.

Гэтэл аймгийн Засаг даргын 2024 оны … дугаар сарын ..-ны өдрийн … дугаар захирамжаар нэр бүхий иргэдийн газар эзэмших эрхийг цуцалсны дотор иргэн С-д хамаарах газар орсноор тэрээр шүүхэд маргажээ.

Аймгийн Засаг дарга иргэний газар эзэмших эрхийг хүчингүй болгосон захирамждаа анх газар эзэмшүүлсэн захирамжгүйгээр мэдээллийн санд оруулсан, мэдээллийн санд тусгаагүй нэгж талбарын хувийн хэрэг байхгүй гэх үндэслэлийг дурджээ.

Гэтэл хариуцагч Архангай аймгийн Засаг дарга нь нэхэмжлэгчийн газар эзэмших эрхийг цуцлахдаа нэхэмжлэгчид газар эзэмшүүлэх шийдвэр /захирамж/ гарсан эсэх үйл баримтыг шалган тогтоох үүргээ бүрэн гүйцэт хэрэгжүүлээгүй байна гэж үзсэн. Тухайлбал,

Шүүхээс уг маргааныг шийдвэрлэхдээ газар эзэмшигч иргэний эзэмшиж буй газрын нэгж талбарын хувийн хэргийг хөтлөх, хадгалах чиг үүрэг нь захиргааны байгууллагад өөрт нь хадгалагдаж буй нөхцөлд эл үндэслэлээр нэхэмжлэгчийг буруутгах, нэхэмжлэгчийг газар эзэмших эрхийг хөндөх хууль зүйн үндэслэлгүй,

Мөн шүүхээс аймгийн Засаг дарга нь доод шатны Засаг дарга болох сумын Засаг даргын захирамжийг хүчингүй болгох эрх хэмжээ олгогдсон боловч өмнө буюу 2011 онд гаргасан доод шатны Засаг даргын шийдвэрийг 2024 онд буюу хэдийд ч ямар ч хамаагүй үндэслэлээр хүчингүй болгох боломжгүй гагцхүү хуульд заасан зайлшгүй хүчингүй болгохоор тодорхой заасан нөхцөлд л хүчингүй болгох боломжтой.

Өөрөөр хэлбэл төрийн эрх бүхий байгууллага, албан тушаалтан өөрийн шийдвэр, үйлдэл /эс үйлдэхүй/-ээрээ газрын тухай хууль тогтоомж, газар эзэмшигч, ашиглагчийн хууль ёсны ашиг сонирхлыг зөрчсөн бол түүний дээд шатны байгууллага, албан тушаалтан, .хууль бус шийдвэрийг хүчингүй болгож, үйлдлийг таслан зогсоох эрх хариуцагчид хадгалагдаж буй боловч энэхүү эрх нь захиргааны актыг гаргасан өдрөөс хойш таван жилийн дотор, гагцхүү хуульд заасан нөхцөлд л хүчингүй болгож болохоор хязгаарлагдана гэж шүүхээс дүгнэлт хийж нэхэмжлэлийн шаардлагыг бүхэлд нь хангаж шийдвэрлэжээ.

Шийдвэрийг бүтнээр харах цахим холбоос: https://www.shuukh.mn/single_case/17574?daterange=2024-01-01%20-%202025-03-17&id=1&court_cat=3&bb=1

Тоймыг бэлтгэсэн: Архангай аймаг дахь Захиргааны хэргийн анхан шатны шүүхийн шүүгч А.Түвшинтулга