Шүүхийн шийдвэрийн огноо, дугаар: Архангай аймаг дахь Захиргааны хэргийн анхан шатны шүүхийн 2024 оны 10 дугаар сарын 21-ний өдрийн 109/ШШ2024/0032

Тоймын огноо, дугаар: 2025 оны 3 дугаар сарын 17, Дугаар 3

Тоймын төрөл: Шүүхийн шийдвэрийн тойм

Шийдвэрийн төлөв: Хүчин төгөлдөр болсон

Санамж: Энэхүү тойм нь шүүхийн шийдвэрийг орлохгүй бөгөөд олон нийтийг мэдээллээр хангах зорилготой болно.

Нэхэмжлэгч Архангай аймгийн “Y” намын хорооноос аймгийн сонгуулийн хороонд холбогдуулан “Х” намаас нэр дэвшүүлсэн иргэн Ч, Б нарыг бүртгэсэн бүртгэлийг хүчингүйд тооцуулахаар маргажээ.

Иргэн Ч, Б нарын хувьд “Ү” намын гишүүн байсан бөгөөд орон нутгийн сонгуульд өрсөлдөхдөө тус намынхаа гишүүнчлэлээс татгалзаж “Х” намд гишүүнээр элсэн тус намаасаа нэр дэвшиж сонгуульд өрсөлджээ.

Нэхэмжлэгч “Ү” намын зүгээс эдгээр иргэд нь чөлөөлөгдсөн аймгийн намын хорооны даргын шийдвэрийн дагуу намын гишүүнээс гарч өөр намд элсэн, сонгуульд өрсөлдөхөөр материалаа хүргүүлснийг аймгийн сонгуулийн хороо хүлээн авч бүртгэсэн нь нэг намын гишүүнийг өөр намаас нэр дэвшүүлэхийг хориглосон хуулийн зохицуулалттай нийцэхгүй байх тул эдгээр нэр дэвшигч иргэдийг бүртгэсэн тогтоолыг хүчингүй болгуулах шаардлага гаргажээ.

Шүүхээс иргэн өөрийн үзэл бодол, хүсэл зоригийн үндсэн дээр сайн дураараа эвлэлдэн нэгдэх буюу аль нэг намд гишүүнээр элсэх намаас гарах, намыг дэмжих, эс дэмжих нь иргэний Үндсэн хуулиар баталгаажуулсан үндсэн эрх бөгөөд намын гишүүнчлэлээс хассан эрх бүхий этгээдийн тушаал гарсан эсэхээс үл хамааран намаас гарах тухай өргөдөл гаргаснаар түүнийг намаас гарсанд тооцохоор тухайлсан хуульд зохицуулсан байх тул эдгээр иргэдийн “Х” намд элсэн, тус намаасаа нэр дэвшиж орон нутгийн сонгуульд өрсөлдөхөөр бүртгүүлсэн тогтоолыг хууль бус гэж үзэх үндэслэлгүй гэж дүгнэн нэхэмжлэлийн шаардлагыг хэрэгсэхгүй болгон шийдвэрлэжээ.

Шийдвэрийг бүтнээр харах цахим холбоос: https://www.shuukh.mn/single_case/17286?daterange=2024-01-01%20-%202025-03-17&id=1&court_cat=3&bb=1

Тойм бичсэн: Архангай аймаг дахь Захиргааны хэргийн анхан шатны шүүхийн шүүгч А.Түвшинтулга