ШҮҮХИЙН ШИЙДВЭРИЙН ТОЙМ
ИРГЭНД ЭЗЭМШҮҮЛЭХ ГАЗАР НЬ ТУХАЙН АЙМАГ, ХОТЫН ХӨГЖЛИЙН ЕРӨНХИЙ БОЛОН ХЭСЭГЧИЛСЭН ТӨЛӨВЛӨГӨӨТЭЙ НИЙЦЭХ УЧИРТАЙ
2025-03-25 Админ Хандсан тоо: 29 Хуваалцах
Шүүхийн шийдвэрийн огноо, дугаар: Архангай аймаг дахь Захиргааны хэргийн анхан шатны шүүхийн 2024 оны 12 дугаар сарын 17-ны өдрийн 109/ШШ2024/0039
Тоймын огноо, дугаар: 2025 оны 3 дугаар сарын 17, Дугаар 5
Тоймын төрөл: Шүүхийн шийдвэрийн тойм
Шийдвэрийн төлөв: Хүчин төгөлдөр болсон
Санамж: Энэхүү тойм нь шүүхийн шийдвэрийг орлохгүй бөгөөд олон нийтийг мэдээллээр хангах зорилготой болно.
Архангай аймгийн Засаг даргын 2022 оны … дүгээр сарын ..-ны өдрийн …дугаар захирамжаар нэр бүхий иргэдэд Эрдэнэбулган сумын … дугаар баг, Булганхангай болон Шинэ наран хороололд гэр бүлийн хэрэгцээний зориулалтаар газар эзэмших эрх олгосны … дугаарт иргэн Ц-д Булганхангай …тоотод 400м2 газрыг 20 жилийн хугацаатай эзэмших эрх олгожээ.
Гэтэл аймгийн Засаг дарга 2024 оны …. дугаар сарын …-ний өдрийн … дүгээр захирамжаар иргэн Ц-д олгосон газар эзэмших эрхийг Цэцэрлэг хотын хөгжлийн болон хэсэгчилсэн ерөнхий төлөвлөгөө зөрчсөн гэх үндэслэлээр хүчингүй болгосноор уг маргаан үүссэн байна.
Цаг хугацааны хувьд нэхэмжлэгчид газар эзэмшүүлсэн шийдвэр гарахаас өмнө Архангай аймгийн иргэдийн Төлөөлөгчдийн Хурлын 2019 оны … дугаар сарын ..-ны өдрийн … дугаар тогтоолоор Цэцэрлэг хотын 2018-2038 он хүртэлх хөгжлийн ерөнхий төлөвлөгөөг баталж, Цэцэрлэг хотын ерөнхий төлөвлөгөөг Цэцэрлэг хотын хот байгуулалтын үндсэн баримт бичиг болгож, аймгийн Газар зохион байгуулалтын ерөнхий төлөвлөгөө болон бусад төсөл, хөтөлбөрүүдийг уялдуулан хэрэгжүүлж ажиллахыг аймгийн Засаг даргад үүрэг болгожээ.
Мөн тус хурлын 2019 оны … дугаар сарын..-ны өдрийн 13 дугаар тогтоолоор Цэцэрлэг хотын шинэ Наран хорооллын хэсэгчилсэн ерөнхий төлөвлөгөөг баталж, аймгийн газар зохион байгуулалтын ерөнхий төлөвлөгөө болон бусад төсөл, хөтөлбөрүүдтэй уялдуулан хэрэгжүүлж ажиллахыг аймгийн Засаг даргад үүрэг болгожээ
Маргаан бүхий энэ нөхцөлд, дээрх ерөнхий төлөвлөгөө, уг төлөвлөгөөний дагуу батлагдсан хэсэгчилсэн төлөвлөгөөг зөрчиж төлөвлөгөөнд туссан газартай давхцуулан иргэнд газар эзэмшүүлэх захирамж гаргасан нь хууль зүйн үндэслэлгүй гэж шүүхээс үзжээ.
Нөгөөтээгүүр аймгийн Засаг дарга урьд гаргасан захирамжийнхаа хууль тогтоомжид нийцээгүй хэсгийг эсхүл захирамжаа бүхэлд нь хүчингүй болгох эрхийг тухайн Засаг даргад хуулиар олгогдсон гэж үзнэ. Гагцхүү ийнхүү өмнө гаргасан захирамжаа Засаг дарга өөрөө хүчингүй болгох гол үндэслэл нь хуульд нийцээгүй тохиолдолд хэрэгжихээр байна.
Ийнхүү нэхэмжлэгчийн эзэмшиж байсан газар нь Архангай аймгийн төв Цэцэрлэг хотын 2018-2038 он хүртэлх хөгжлийн ерөнхий төлөвлөгөө, Цэцэрлэг хотын шинэ Наран хорооллын хэсэгчилсэн төлөвлөгөөнд тусгагдсан газартай давхцалтай байх тул шүүхээс аймгийн Засаг даргын урьд гаргасан захирамжаа хүчингүй болгосныг Хот байгуулалтын тухай хууль, Газрын тухай хуулийн холбогдох зохицуулаллтай нийцсэн гэж үзэн, нэхэмжлэлийг хэрэгсэхгүй болгож хариуцагч аймгийн Засаг даргын дээрх үндэслэлээр иргэний газар эзэмших эрхийг хүчингүй болгосон захирамжийг хууль зүйн үндэслэлтэй гэж шүүх шийдвэрлэжээ
Шийдвэрийг бүтнээр харах цахим холбоос: https://www.shuukh.mn/single_case/17587?daterange=2024-01-01%20-%202025-03-17&id=1&court_cat=3&bb=1
Тоймыг бэлтгэсэн: Архангай аймаг дахь Захиргааны хэргийн анхан шатны шүүхийн шүүгч А.Түвшинтулга