Тоймын төрөл: Шийдвэрийн тойм

Шүүхийн нэр, шийдвэрийн дугаар: 2024 оны 07 дугаар сарын 01-ны өдрийн 137/ШШ2024/00156

Тоймын дугаар, огноо: 2024.09.10

Шийдвэрийн төлөв: Хүчин төгөлдөр болоогүй

Санамж: Энэхүү тойм нь шүүхийн шийдвэрийг орлохгүй бөгөөд зөвхөн олон нийтийг мэдээллээр хангах зорилготой болно

Агуулга: Нэхэмжлэгч Н нь М-г орон сууцны төлбөрөө хугацаандаа өгөөгүй гэх үндэслэлээр хариуцагчийг орон сууцыг хариуцагчаас албадан чөлөөлүүлэх нэхэмжлэл гаргасан,

Хариуцагч М нь Н-тэй амаар хийсэн орон сууцыг 65,088,000 төгрөгт худалдах, худалдан авах хэлцлийг хүчин төгөлдөр бусад тооцуулж, байрны урьдчилгаа, ипотекийн зээлийн төлбөр, засвар, тавилга, СХӨ болон дулааны төлбөрт төлсөн 69,820,000 төгрөг гаргуулах сөрөг нэхэмжлэлийг шүүхэд гаргасан.

Хэрэгт авагдсан баримтаар, Н нь ипотекийн зээлийн барьцаанд байгаа өөрийн өмчлөлийн орон сууцыг аман хэлцэл хийж М-д худалдаж, М нь байрны урьдчилгаанд 26,500,000 төгрөг, ипотекийн зээлийг 2022 оны 10 сар гэхэд бүрэн төлөх талаар харилцан тохиролцож, Н нь урьдчилгаа 26,500,00 төгрөгийг, М нь маргаан бүхий орон сууцыг тус тус хүлээн авсан. М нь 2020 оны 11 сарын 15-наас эхлэн 2024 оны 02 сарын 26-ны өдөр хүртэл зээлийн төлөлтийг төлсөн үйл баримт тогтоогдож байна.

Хэдийгээр талууд хүсэл зоригоо илэрхийлэн нэг тал орон сууцыг худалдах, нөгөө тал үнийг тодорхой хугацаанд төлөх үүргийг хүлээсэн байх боловч энэхүү хэлцэл хүчин төгөлдөр байхыг шаардах юм.

Н, М нарын хооронд хийгдсэн аман хэлцэл нь худалдах, худалдан авах гэрээний агуулгыг тодорхойлох боловч Иргэний хуульд үл хөдлөх хөрөнгө худалдах, худалдах авахад гэрээ болон шаардагдах баримт бичгийг нотариатаар гэрчлүүлэх, улсын бүртгэлд бүртгүүлэхтэй холбогдсон зардлыг худалдан авагч хариуцна гэж заасан. Өөрөөр хэлбэл үл хөдлөх хөрөнгө худалдах, худалдан авахад тусгай шаардлага үүснэ, мөн худалдах үйлдэл хийх үед гарч болох зардлыг хуваарилна гэж ойлгоно.

Н, М нар нь орон сууцыг худалдах, худалдан авах үедээ холбогдох баримт бичгийг нотариатаар гэрчлүүлэх, улсын бүртгэлд бүртгүүлэх хуулийн шаардлагыг хангах үүрэгтэй. Түүнчлэн хэлцэл хүчин төгөлдөр байх зайлшгүй нөхцөл болсон зөвшөөрөл олгох эрх, үүрэг бүхий гуравдагч этгээд буюу ипотекийн зээл олгосон банканд мэдэгдэж зөвшөөрөл аваагүй гэж шүүх үзсэн.

Шүүх хуулийн шаардлага хангаагүй хэлцлийг талууд хийсэн гэж үзэж Н, М нарын хооронд хийгдсэн орон сууц худалдах, худалдан авах хэлцлийг хүчин төгөлдөр бусад тооцож, худалдан авагч М-ийг байрнаас албадан чөлөөлж, М-ийн байрны урьдчилгаанд болон зээлд төлсөн нийт 37,976,000 төгрөгийг Н-ээс гаргуулж М-д олгож, нотлох баримтын хүрээнд нотлогдоогүй гэж үзсэн 31,844,000 төгрөгийн шаардлагыг хэрэгсэхгүй болгож шийдвэрлэсэн.

Шийдвэрийг бүтнээр харах цахим холбоос: https://shuukh.mn/single_case/144348?daterange=2024-01-01%20-%202024-09-09&id=1&court_cat=1&bb=1