Шүүхийн шийдвэрийн огноо, дугаар: Дорноговь аймаг дахь Сум дундын эрүүгийн хэргийн анхан шатны шүүхийн 2023/ЦХШЗ/40

Тоймын огноо, дугаар: 2023.06.23-ны №42

Тоймын төрөл: шүүхийн процессын тойм

Шийдвэрийн төлөв: Хүчин төгөлдөр болсон

Санамж: Энэхүү тойм нь шүүхийн шийдвэрийг орлохгүй бөгөөд олон нийтийг мэдээллээр хангах зорилготой болно.

Дорноговь аймгийн прокуророос Э-д холбогдуулан хүсэл зоригийн эсрэг хүч хэрэглэж, биеэ хамгаалах, эсэргүүцэл үзүүлэх чадваргүй, бусад нөхцөл байдлын улмаас эрхшээлдээ байгааг далимдуулан хүчээр бэлгийн харьцаанд орж бага насны хүүхдийг хүчиндсэн гэмт хэрэгт холбогдуулан эрүүгийн хэрэг үүсгэж, яллагдагчаар татжээ.

“Бага насны хүүхэд” гэдэгт арван дөрвөн насанд хүрээгүй хүнийг ойлгох бөгөөд бага насны хохирогч нь өөрийн үзсэн, харсан, сонссон зүйлийн талаар үнэн зөв ярьдаг ба сэтгэхүй, оюун ухаан нь гүйцэт хөгжөөгүй, болж буй үйл явдлыг ойлгож үнэлэлт, дүгнэлт өгөх чадваргүй, зохиож ярих, худал хэлэх, гарах үр дагавар, хор уршгийг тооцоолох чадамжгүй байдаг.

Яллагдагч Э нь хувийн байдлын хувьд урьд ял шийтгэлгүй, согтууруулах ундаа хэрэглэдэг, үйлдэгдсэн гэмт хэргийн шинжийн хувьд хүчиндэх гэмт хэргийг бага насны хүүхдийн эсрэг үйлдсэн, энэ хэргийн хохирогч Д нь түүний төрсөн охины хүүхэд болох нь хавтаст хэрэгт авагдсан нотлох баримтаар нотлогдож байна.

Э-д сонсгосон ялын хугацаа нь 12 жилээс 20 жил хүртэл хугацаагаар, эсхүл бүх насаар нь хорих ялтай байх тул Эрүүгийн хэрэг хянан шийдвэрлэх тухай хуулийн 14.9 дүгээр зүйлийн 2 дахь хэсэгт заасан “яллагдагчийн хувийн байдал, үйлдэгдсэн гэмт хэргийн шинжийг харгалзан” гэсэн үндэслэлээр цагдан хорих таслан сэргийлэх арга хэмжээ авахаар ирүүлсэн прокурорын саналыг хүлээн авах нь зүйтэй гэж үзэж Э-г 1 сарын хугацаагаар цагдан хорьж шийдвэрлэв.

Тойм бэлтгэсэн: Дорноговь аймаг дахь Сум дундын эрүүгийн хэргийн анхан шатны шүүхийн шүүгч Д.Адъяасүрэн